Keuses

Elke dag staan ons voor ‘n keuse . Daar kom veral op een tydperk in die lewe ‘n kruispad waar ons moet stil staan om te kies. Van daardie keuse hang ewighede af. Sal ons links gaan, of regs? Sal ons die wêreld dien, of die Here?

Josua moes ook kies en sy besliste woorde was: “Aangaande my en my huis, ons sal die Here dien.” Eenmaal het Elia ook aan die volk gevra: “Hoe lank hink julle op twee gedagtes? As die Here  God  is, volg Hom en as Baäl dit is, volg hom na.” Hulle wou nie graag kies nie. Hulle wou nie die Here heeltemal laat los nie, want hulle het geweet toevlug in nood Hy vir hulle was  en hoe dikwels hy hulle al uitgered het. Maar hulle wou ook nie die wêreld heeltemal laat los nie. Hulle was bevrees dat hulle sou skade ly aan plesier, aan rykdom, aan vriende, aan populariteit.

Maar hy wat aarsel om reg te kies, is verlore. Hy wat hink op twee gedagtes en besluitloos bly wat sy lewensrigting betref word maklik ‘n prooi van die vyand. Wanneer is daar ‘n beter en meer gepaste tyd om te kies as aan die begin van ‘n nuwe jaar? As u bewus is dat u nog altyd in die verkeerde rigting gegaan het, maak vandag ‘n regsomkeer en gaan in die teenoorgestelde rigting. Plaas u voetstappe  met ‘n besliste keuse op die smal weg en wandel daarop.

Dit is die enigste weg wat u aan die einde van u lewe sal bring waar u dan graag wil wees. Dit kan so maklik te laat word om daardie uitdraai-paadjie na die regte kant te neem. Dit is lewenbelangrik dat elkeen moet kies en reg kies.

Wat sal jou keuse wees? Wat is dit vandag? As die Here God is, dien Hom of ……………………………..? 

Engela